CEBU CITY-Mipahibalo si Cebu Governor Gwendolyn Garcia nga limitado na ang lihok sa mga Sugbuanon sugod karong Lunes, Marso 30 human gipaubos ang lalawigan sa Enhanced Community Quarantine.
Kini ang nahimong desisyon sa gobernadora human nakigsabot sa mga mayor sa mga kalungsuran ug siyudad kagahapon sa kapitolyo.
Matud ni Garcia nga sugod karong Lunes, wala nay public utility vehicles ang makabyahe “until further notice.”
Ubos sa quarantine, dili na makagawas-gawas ang mga tawo gawas lang sa usa ka family member kinsang adunay palitonon nga pagkaon o uban pang necessities sa gawas. Kinahanglan nga muhatag ang mga local government units og quarantine passes ngadto sa matag panimalay.
Samtang exempted sa maong kamanduan ang fronliners, taga-media, lakip na ang mga anaa sa food production, agri-industries, ug uban pa.
Una na’ng gidid-an sa provincial government ang pag-abot sa mga international flights sa Sugbo. Samtang mi-awhag usab ang gobernadora sa mga pribadong kompaniya, kinsang gitugutang mag-operate ubos sa quarantine, nga mohatag og libreng transportasyon sa mga trabahante. | By Gian Navarro
