CEBU CITY – Gitinguha sa Goodbye Garbage Movement nga mahimong garbage-free ang Sugbo hinungdan sa ilahang pagpahigayon ug mga nagkadaiyang seminars and workshops.
Gibutyag ni Leo Manongas, ang head sa naasoy nga grupo, nga ilahang gi-edukar ang katawhan sa mga kabarangayan sa tukma nga kagamitan sa basura arun nga kini mapahimuslan.
Usa na niini ang paghimo ug ‘enzyme’ sa mga malata nga basura susama na lang sa mga panit sa prutas, ingun man mga utanon.
Gipasabot ni Manongas nga ang maong klase sa mga basura ang mahimong gamiton isip fertilizer, ingun man pagtangtang sa kagaw sa bisan asa mang su-ok sa panimalay.
Subay niini, gipahibalo ni Manongas nga aduna na’y Memorandum of Understanding (MOU) ang ilahang grupo ug ang Cebu City Environment and Natural Resources Offices (CCENRO) nga gipangulohan ni Atty. John Jigo Dacua.
Matud pa nga ang unod sa maong kasabotan ang pagkab-ot sa Goodbye Garbage Movement sa 80 ka mga barangay sa dakbayan sa Sugbo arun sa pagpahigayon ug seminar and workshops kalabot na sa pag-ferment sa mga basura nga magsugod gayud sa tagsa-tagsa ka mga panimalay.
Sigon ni Manongas nga dili lang sa seminar and workshops sila kutob inay ang pagpatuman sa balaud kung diin giingong sila mismo ang mukiha sa mga barangay nga wala mag-apply sa ilahang nakat-unan.
Gitataw niini nga ilaha kini nga gihimo alang lang usab sa kaayohan sa tanan.
Nagkanayon usab si Manongas nga gawas sa dakbayan sa Sugbo, andam usab ang ilahang grupo nga mupahigayon ug libre nga seminar and workshops sa uban pang Local Government Units (LGUs).
