CEBU CITY — Gi-angkon ni Cebu City Councilor ug Emergency Operation Center (EOC) deputy chief Joel Garganera nga usa ka hagit alang sa publiko ang pagsunod sa health protocols aron dili mabalik sa lockdown ang dakbayan.
Kini ang tubag ni Garganera human mipadayag si Health Usec. Maria Rosario Vergeire nga anaa sa “safe zone” ang syudad sa Sugbo.
Apan gihingusgan sa konsehal nga nabalaka kini gumikan kay nibalik sa ‘double digits’ ang mga bag-ong kaso sa COVID-19 nga natala sa EOC matag adlaw.
Napaglangtawan niini nga ubay-ubay ka mga tawo ang nangumpyansa ug wala na misunod sa protocols batok sa sakit.
Sigon pa niini nga nagkinahanglan ang gobyerno og kooperasyon gikan sa mga tawo arun makalampus nga mapakunhod sa mga kaso ug mawala ang COVID-19 sa dakbayan.
Apan gibutyag ni Cebu City Mayor Edgardo Labella nga anaa sa iyang kamut ang desisyon kung iyang irekomendar sa Inter-Agency Task Force ang Enhanced Community Quarantine (ECQ) ang syudad.
Hagit pa niini sa publiko nga mosunod kanunay sa health protokols ug guidelines batok sa makamatay nga kagaw.
Kahinumdumang gilusad ni Labella ang “Oplan Bulabog” aron sutaon ang mga establisimento kung nisunod ba ang mga bisita sa health protocols.
Gibutyag usab ni Labella nga pahugtan og balik ang mga border control alang sa mga mosulod ug mogawas sa dakbayan aron masiguro ang striktong lagda sa kwarantina.
Kasamtangang gipaubos sa Modified General Community Quarantine (MGCQ) ang dakbayan sa Sugbo sulod na sa tulo ka buwan. (ekp/gn)
