Nakaabante na sa semifinals sa 2025 EuroBasket ang Team Germany ug Team Finland human sa malampusong kampanya sa duha ka team sa quarterfinals.
Gipildi sa Germany ang Slovenia sa quarterfinals bisan pa sa 39 puntos ni Luka Doncic, sa final score nga 99-91.
Gipangulohan ni Orlando Magic guard Franz Wagner ang German team nga adunay 23 puntos samtang ang team captain nga si Dennis Schröder miamot og 20 puntos ug pito ka assists.
Sa laing bahin, gipildi sa Finland ang Georgia sa quarterfinals, sa final score nga 93-79.
Ang forward sa Utah Jazz nga si Lauri Markkanen maoy nangulo sa Finnish team sa kadaugan pinaagi sa iyang 17 puntos ug unom ka rebounds samtang niamot og 19 puntos si forward Mikael Jantunen.
Ang duha ka dagkong teams gikatakdang magsangka sa semifinals sa nagpadayon nga EuroBasket, usa sa pinakadakong basketball tournaments sa Europe.
