Narekober sa kapolisan ang usa ka SUV nga maoy gigamit sa pagtulis sa duha ka mga jewelry shop sa dalan Calderon, Barangay Ermita, dakbayan sa Sugbo niadtong Agosto 8, 2024.
Gawas sa SUV nga anaa na sa kustodiya sa Carbon Police Station, malampuson usab nga nasikop ang usa sa mga suspek nga giilang si Marcial Ponesto.
Ang nasangpit nga operasyon nahitabo kagabii niadtong Martes, Agosto 13, 2024 sa Barangay Paknaan, dakbayan sa Mandaue.
Sa pagkasikop niini, nakuha usab gikan kanila ang usa ka granada, armas ug gituohang shabu.
Base sa nakuhang impormasyon, ang sakyanan nga adunay plate number DAB 5200 gipanag-iya sa usa ka Vivian Dacumos nga taga Antipolo City sa Region 4-A CALABARZON ug katapusang narehistro niadtong Nobyembre 3, 2023.
Sa pasiunang detalye, naglaway ang mga suspek nga giingong sakop sa Parojinog Robbery Group.
Matod sa kapulisan nga suportado kini sa mga ebidensiya nga ilang nahipos ug sa mga litrato sa mga suspek.
Dugang pa sa kapulisan nga ang nahisgutang upat ka sakop sa Parojinog group niapil sa pagpanulis, samtang lima ang mga lokal nga batang lalaki nga taga Mindanao apan nagpuyo sa Sugbo.
Posibleng mapasaka na sa korte karong adlawa ang kaso batok sa mga suspek.
Sa pagkakaron, gipalawman ug gipadayon sa mga otoridad ang paggukod sa ubang mga suspek sa insidente sa pagpangawat ubos sa pamunoan ni Acting CCPO Director Police Colonel Antonietto Cañete aron hingpit na kining masulbad ug masilotan ang mga sad-an sa tukmang silot.
Samtang si Cebu City Acting Mayor Raymond Alvin Garcia mipahayag nga kontento siya sa imbestigasyon nga gihimo sa kapulisan sa dakbayan sa Sugbo, nga nagpasiugda nga nasikop sa mga kapulisan ang usa ka suspek ug nakuha ang getaway vehicle sa mga tulisan.
