CEBU-
Nakarehistro ang Philippine Coast Guard-Central Visayas og kinatibuk-ang 181 ka mga barko ug mga sakyanan sa tubig nga nisalmot sa fluvial procession kaganiha nga kabahin sa Fiesta Señor 2023.
Matod pa sa mga opisyal sa PCG-7 nga sa 181 nga narehistro, 16 ang yate, 17 ka tugboat, 131 ka motorbanca ug 17 ka barko nga ubos sa 300 gross tonnage ang gibug-aton.
Gilugwayan ang fluvial procession karong tuiga nga paingon sa South Road Properties nga moagi ilawom sa iconic Cebu-Cordova Link Expressway (CCLEX).
Ang fluvial procession maoy usa sa mga highlight atol sa tinuig nga kapistahan sa Sinulog. Ang kalihokan gihunong sulod sa duha ka tuig tungod sa pandemya sa COVID-19.
Sa pakighinabi sa Bombo News Team kang Fr. John Ion Miranda ang OSA Head Secretariat ug Chair of the safety and security committe of Fiesta Senior nga labing importante sa tanan dili lamang sa mga pasundayag sa sinulog kundili ang pagtou sa mga katawhan kang Sr. Sto. Nino nga maghatag ug giya aron maluwas kita sa dautan.
Samtang, sa wa pa ang fluvial procession ang kagamhanan sa dakbayan sa Mandaue nipadayag sa rota sa Traslacion sa higayon nga moabot ang mga imahen ni Señor Santo Niño ug Our Lady of Guadalupe sa Mandaue City niadtong Enero 13, Biyernes.
Matud pa nga gikan sa utlanan sa Cebu City ug Mandaue City, ang Traslacion moagi sa L. Jaena Street sa Subangdaku diretso sa A. Del Rosario Street dayon liko sa tuo sa S. B. Cabahug Street sa Barangay Centro paingon sa National Shrine of Saint Joseph.
