Lima ka mga konsehal sa siyudad ang magsilbing overseer sa mga department head, matod ni Acting Mayor Raymond Alvin Garcia niadtong lunes, Mayo 27, 2024.
Sa iyang pakigpulong human sa flag ceremony niadtong Lunes, si Garcia niingon nga ang mga department heads nagkasabot nga ang mga konsehal maoy modumala sa lain-laing departamento sa Siyudad.
Unang nipahibawo si Garcia sa mga konsehal nga maoy modumala sa mosunod nga mga departamento: Francis Esparis alang sa Department of Social Welfare Services; Joel Garganera, ang Cebu City Disaster Risk Reduction and Management Office; Renato Osmeña, ang Office of the City Market; Noel Wenceslao, Office of the City Assessors; ug Jerry Guardo, ang Department of Engineering and Public Works.
Laing Konsehal Phillip S. Zafra ang gikatakda usab nga mahimong overseer sa wala pa mabutyag nga departamento.
Human sa anunsyo, si Garcia nipahigayon og press conference, diin iyang giingon nga ang mga konsehal, bisan pa man og adunay executive functions, dili makabuntog sa mayor.
Matod niya ang mga konsehal nga iyang nahisgutan maoy personal nga miduol kaniya ug nipadayag sa ilang tuyo nga tabangan siya.
Sa dihang gipangutana kon aduna bay mga komitiba nga modumala ang mga sakop sa minority bloc, si Garcia niingon nga wa pay bisan usa kanila ang nipadayag sa ilang tuyo.
Apan bukas siya sa posibilidad nga tabangan sab siya sa pagdumala sa pipila ka departamento. Ang konseho adunay 18 ka miyembro.
