CONSOLACION,CEBU- Sikop sa mga tinugyanan sa balaod ang usa ka giilang druglord ug duha ka kasabwat niini atol sa usa ka buy-bust operation nga gilusad sa mga kapulisan sa Purok Batong, Barangay Danglag sa bukirang bahin sa lungsod sa Consolacion niadtong alas 5:30 sa hapon sa adlawng Dominggo, Hunyo 13, 2025.
Gipangunahan sa Municipal Drug Enforcement Unit (MDEU) sa Consolacion Municipal Police ang maong operasyon sa pakig-alayon na sab sa Philippine Drug Enforcement Agency – Central Visayas (PDEA-7).
Giila ang mga dinakpan nga silang si Rhanie Mark Anthony Mahusay Yuson , 33-anyos, taga Cogon, Liloan ug maoy gituohang High-Value Individual ug mga kasabwat niini nga silang Joseph Ian Go Villamor, 22-anyos, taga San Vicente, Liloan ug si Marc Christian Caballero, 27-anyos ug taga lungsod sa Consolacion.
Nakuha sa mga dinakpan ang 10 ka mga nagkadaiyang gidak-on sa pakete sa gituohang shabu, usa ka sling bag, ug uban pang drug paraphernalia lakip na ang marked money nga gigamit sa mga awtoridad.
Gibana-banang adunay standard drug price ang nahipos nga mga ebidensya sa P2.7-milyones sa gibug-atong 400 gramos sa gituohang shabu.
Kasamtangang nakatanggong sa Consolacion Municipal Police Station ang mga dinakpan diin nagpaabot sa dokumentasyon sa ilang atubangong kaso samtang ang mga narekober nga ebidensya kau gipadala sa Cebu Provincial Forensic Unit – Northern Cebu Satellite Forensic Office sa dakbayan sa Danao alang sa pormal nga pagsusi.
