CEBU CITY — Giimbestigaran na sa PNP-CIDG ang giingong pagpahigayon og prusisyon atol sa kapistahan sa Sitio Alumnos, Barangay Basak San Nicolas sa dakbayan sa Sugbo.
Kini human nga nag-viral sa social media ang giingong pagtapok sa mga residente ug nakahigayon pa og Sinulog dance alang sa kapistahan ni Sr. Sto. Niño.
Tungod niini, niresponde ang mga sakop sa PNP-CIDG ug ang DILG sa buhatan sa kapitan alang sa pagpakisayud kalabot na sa maong isyu.
Wala nagtuo si Kapitan Norman Navarro nga nahitabo ang maong prusisyon bisan pa man og wala kini misugot sa pagpahigayon niini.
Sa eksklusibong interview sa Bombo Radyo Cebu ngadto ni Kapitan Navarro, nagkanayon kini nga kaduha nang nananghid ang chapel president kaniya.
Una, wala misugot si Navarro nga magpahigayon og santos nga misa ug ikaduha mao ang foot procession sanglit gidili ang mass gathering.
Hinuon nisugyot ang kapitan nga mopahigayon na lang ang kapilya og convoy diin isuroy ang imahe sa Balaang Bata ngadto sa mga kabalayan sakay sa sakyanan.
Dugang pa ni Navarro nga pursigido kining mapasakaan og kaso ang organizer sa kapyestahan kung mapamatud-an man ang maong salaud. (with reports by Bombo Benjie Tanghiyan/gn)
