Gibaligya sa subasta sa kantidad nga $2,734,000 o katumbas sa kapin sa P150-M ang usa ka electric guitar gikan sa sikat nga gitarista nga si Eddie Van Halen.
Sumala sa Sotheby’s auction house, kini ang unang Kramer guitar nga nahimo ug napatukar.
Gitawag kini nga “Kramer Ad” sunod sa advertisement sa maong gitara.
Gimodelo kini gikan sa unang gitara ni Van Halen, nga ang Frankenstein, nga adunay kombinasyon sa itom, pula ug puti nga mga kolor.
Gihimo kini niadtong 1982 ug gigamit niya kini sa iyang mga live show niadtong 1982 ug 1983 sa Argentina, Venezuela ug Brazil.
Giregalo ni Van Halen ang gitara ngadto sa iyang technician nga si Rudy Leiren, diin aduna pa gani kini gisulat nga dedikasyon alang kaniya.
Gibaligya ni Leiren ang gitara ngadto kang Mick Mars, ang gitarista sa Motley Crue.
