CEBU CITY-Gidakop ang gitumbok nga mastermind sa pagpanulis sa Oro Sugbo Pawnshop and jewelry store sa dalan sa Colon dakbayan sa Sugbo, sa dihang miadto kini sa police station sa Argao aron limpyohon unta ang iyahang pangan.
Giila kini nga si Jigger Geverola, hingkod ang pangedaron, lumad nga taga Brgy. Gudlang lungsod sa Argao, Probinsiya sa Sugbo.
Gihulagway sa kapulisan nga kauban sa kalihukan sa New People’s Army kung diin usa ka dakong opisyal sa Communist Party of the Philippines nga milihok sa Midnorth area sa Sugbo niadtong 2000 lakip na ang usa ka suspek sa pagpanulis nga si Norman Manuel nga miyembro sa NPA sa Compostella Valley sa Mindanao.
Gitudlo nga mastermind sa pagpanulis sa iyahang pag-umangkon nga una na nga nadakpan sa kapulisan nga maoy nimaneho sa getaway vehicle sa grupo.
Nagtingkagol na karun sa locked up cell si Geverola sa Cebu City Police Office (CCPO) ug padayun nga gi-tan-aw sa mga otoridad ang pagkatawo sa posibling utok sa nahisgutang pagpanulis.
Kini human naa na sa kustodiya sa kapolisan ang unom ka tawo, usa ka getaway vehicle, ug mga armas nga gigamit sa pagpanulis niadtong Nobiyembre 25, dihang gibana-bana nga anaa sa walo ka mga tawu ang nagpaila sa ilang kaugalingon nga mga ahente sa National Bureau of Investigation aron dakpon ang security guard ug ang mga kawani sa tindahan wala magbantay sa wala pa gitulis ang tindahan.
Duha sa naasoy nga ihap, kasamtangan nga gikustodiya sa kapolisan human masikop sa checkpoint sa Barangay Lamacan, Sibonga, Sugbo naila nga sila si Dann Carlo Flores ug Jordan Baquiano.
Ang laing duha nasikop sa Mandaue City Police Office tungod sa paghupot og walay lisensya nga mga armas ug mga eksplosibo ug kansang kalambigitan sa pagpanulis sa Oro Sugbu kasamtangang gikompirmar.
Sa laing bahin, si Jerome Cambarijan Davin gitumbok nga nikuha sa mga alahas atol sa pagpanulis nga misul-ob og puti nga kalo, itom nga jacket ug mi-ambak gikan sa glass shelf.
Samtang, padayon pang gipangita sa kapolisan ang laing tulo ka posibleng kakunsabo sa pagpangawat, ingon man nga wala pa makuha ang aktuwal nga balor sa kinawat tungod ang nasangpit nga pawnshop sa pagkakaron nagpadayon sa pag-imbentaryo sa mga nawala nga alahas.
