CEBU CITY-Nasikop ang 29-anyos nga si Leonil Demecillo Rivera, nga mao ang gituohang suspek sa ikaduhang sunog nga niigo sa Barangay Tejero, Dakbayan sa Sugbo gahapon sa gabii, Septiyembre 10.
Gibutyag ni Rivera nga nagsugod ang maong sunog sa mismong kwarto niini, kung diin mikatap ang kayo gikan sa gidagkotang insect repellant o katol niini ngadto sa foam sa iyahang higdaanan.
Gihimug-atan niini nga aksidente lang ang nahitabo ug gani nakurat sab siya sa nahimong resulta, kung diin P4.2 million ang nahimong danyos sa maong sunog ug dili mu menos 20 ka balay ang nasunog ug naugdaw.
Miangkon usab ang suspek nga nakasuyop kini og usa ka pakete sa syabu sa wala pa mi-ulbo ang sunog.
Kasamtangang gibalhog sa Waterfront Police Station 3 ang arson suspek.
