CEBU CITY-Gikwestyon sa usa ka environmental group ang kakuwang sa pagpangandam sa gobyerno sa epekto sa El Niño phenomenon.
Gibutyag ni Teody Navea, ang Secretary General sa Sanlakas Cebu, nga matag tuig makasinati ang nasud og huwaw ug gikinahanglan nga proactive ang gobyerno sa mga lakang niini.
Matud pa, dili angayan nga molihok ang gobyerno kung anaa na ang problema, ilabi na kung dili man bag-o sa Pilipinas ang El Niño phenomenon.
Gihulagway niini nga ‘taphaw’ ang pagtagad sa gobyerno arun nga solusyonan ang problema.
Giingong dili angayan nga magsalig na lang sa ayuda ang mga tawo kung adunay kalamidad, inay, gikinahanglan ang usa ka malungtaron nga solusyon.
Nagkanayon si Navea nga nagkuwang gayud sa preparasyon ang gobyerno ilabi na sa tabang niini sa hilabihan nga naapektohan sama na lang sa mga mag-uuma.
