Nakatilaw ang Golden State Warriors sa ikaupat nga quarter og 7-point loss sa kamot sa No.1 team sa eastern conference na Detroit Pistons.
Kini human nagkuwang sa comeback ang Golden State sa katapusang quarter aron papason ang 13 puntos nga labaw sa Detroit Pistons ug napildi sa iskor nga 131-124.
Subling nagpakita ang Detroit guard nga si Cade Cunningham og maayong performance, nakahimo og 11-of-19 field goals ug nakapuntos og 29 puntos, lakip ang lima ka free throws.
Nakahimo usab siya og 11 ka assists ug usa ka block, uban sa upat ka rebounds.
Pito ka mga players sa Pistons ang nakapuntos og double-digit, ug duha ang nakapuntos og double-double.
Samtang, nasayang ang 23 puntos sa NBA superstar nga si Stephen Curry ug ang maayong performance ni Curry natapos sa ikaduhang bahin sa duwa sa dihang mibiya siya sa hardcourt tungod sa knee soreness.
Naningkamot gihapon ang Golden State nga makabawi, apan ang 18 ka 3-pointers sa team dili igo kay gibantayan sa Pistons ang paint area, nga nakapuntos og 62 puntos samtang ang 2022 NBA champion nakapuntos lang og 40 puntos.
Paspas ang dagan sa dula sa Pistons batok sa team ni Curry nga 37 anyos. Sa kinatibuk-an, ang Pistons nakapuntos og 25 ka fast break points samtang ang Warriors nakapuntos lang og 10.
