CEBU CITY — Gibarugan gihapon ni Cebu Priovincial Governor Gwendolyn Garcia nga kamanduan niini nga natugot sa backriding sa motorsiklo alang sa magtiayon o kabanay sa pamilya sa probinsya.
Kini bisan pa man og nibahad ang Department of Interior and Local Government (DILG) nga kasuhan ang gobernadora og kriminal ug administratiba tungod lang kay wala kini nisunod sa mga protocol sa National Inter-agency Task Force (IATF).
Una nang niisyu ang gobernadora og executive order nga natugot sa pag-angkas sa pribadong motorsiklo alang sa magtiayon o mga kabanay sa pamilya.
Apan mipahimangno si DILG Undersecretary Epimaco Densing III nga isyuhan og show-cause order ang kinsang local official nga nagtugot sa pag-backride sa pribadong motorsiklo tungod lang kay sukwahi kini sa mga guidelines sa IATF.
Dugang pa sa opisyal nga mag-atubang ang kinsang maglibkas sa no-motorcycle backrinding ban sa kalapasan sa Bayanihan to Heal As One Act.
Gihimug-atan ni Garcia nga igo lang kining naminaw sa kahingawa sa mga Sugbuanon, kinsang naglisud sa pagpangita og kasakyan ilabi na nibalik na ang operasyon sa pipila ka mga negosyo.
Andam usab ang gobernadora nga atubangon ang maong kaso kung mapamatud-an man sa nasampit nga ahensya. (gn)
