CEBU CITY — Makigkita si Cebu Governor Gwendolyn Garcia sa mga mayor sa tibuok probinsya karong Mayo 15 aron sabutan ang mga lakang ug protocols ning naghinangat nga pag-downgrade ngadto sa general community quarantine.
Kini subay na sa naghinangat na nga pagtapos sa enhanced community quarantine sa mga dakbayan sa Mandaue ug Lapu-Lapu.
Ipahigayon ang maong meeting sa lungsod sa Balamban aron hisgutan ang mga bag-ong polisiya ug mga protocols ubos sa GCQ.
Matud ni Garcia nga nanginahanglan kini og panahom gikan sa mga local chief executives alang sa gi-andam nga mga patakaran.
Lakip usab sa mosalmot sa maong meeting ang mga mayor gikan sa mga dakbayan sa Sugbo, Lapu-Lapu, ug Mandaue aron mahan-ay ang tanang polisiya.
Una nang nagkanayon ang gobernadora nga ubos sa GCQ o ang gitawag nga “enhanced countryside development,” ipatigbabaw ang mga health protocols nga pinasubay sa “new normal” nga pamuyo.
