Padayong gi-monitor sa Cebu Provincial Government, pinaagi sa Cebu Provincial Disaster Risk Reduction and Management Office (Cebu PDRRMO), ang nasinati nga haze karon sa Probinsiya sa Sugbo.
Kini ang gikompirma ni Cebu Provincial Governor Pamela Baricuatro, nga mipahayag nga base sa advisory sa Environmental Management Bureau Region 7 (EMB-7) ug sa Cebu PDRRMO, dili pa kini angay mahimong basehan alang sa pagkansela sa klase sa mga tunghaan sa probinsiya.
Mando usab ni Gov. Baricuatro sa PDRRMO nga padayonon ang pag-monitor ug pag-assess sa kahimtang sa haze sa tibuok probinsiya aron masiguro ang kaluwasan ug kaayohan sa mga Cebuano.
Mipahimangno usab ang gobernador sa mga indibidwal nga adunay respiratory ailments nga kanunay magsul-ob og face mask ug magmatngon sa mga update bahin sa kahimtang sa hangin.
Kahinumdoman nga ang nasinati nga haze sa Probinsiya sa Sugbo gituohang nalambigit sa nagpadayong forest fire sa Kalimantan, Indonesia.
Base sa pinakabag-ong air quality monitoring sa EMB-7, misaka ngadto sa 203 ang Air Quality Index (AQI), nga giklasipikar isip “Very Unhealthy” range. Kini nagpasabot nga mas grabeng pag-amping ang gikinahanglan, ilabina alang sa mga sensitibo sa polusyon sa hangin ug sa mga adunay kondisyon sa respiratory system.
Gidasig ang publiko nga kanunay nga mag-monitor sa opisyal nga mga advisory ug mohimo sa gikinahanglang pag-amping samtang nagpadayon ang monitoring sa kahimtang sa hangin sa Sugbo.
