“Enough is Enough” mao kini ang gibutyag ni Cebu Governonor Pamela Baricuatro atol sa pagpakighinabi niini nga sa mga sakop sa tigbalita nga napuno na ang gobernadora sa legislative department hilabi na nga gilisod-lisod siya sa hunta provincial sa wala pag-aprobar sa mga programa sa gobernadora hinungdan nga nakasulti siya og bati kang Vice Governor Glenn Anthony Soco.
Giangkon sa Gobernadora nga nagka-aslom gayud ang ilang pagtinagdanay human nga nakabuhi kini og isturya nga matud pa “hipokrito” ang Vice-Governor, gumikan sa pagkuwestiyon niini sa Compromise Agreement tali sa Probinsiya sa Sugbo ug Apo Land and Quarry Corp. (ALQC) nga pagpabayad niini gikan sa P1.218 billion ngadto na sa P211.56 million.
Matud ni Baricuatro nga taud-taud na usab siya nagpa-abot sa pag-aprobar sa hunta probinsyal sa budget sa Mobile Kitchen, Mobile Clinic lakip na usab ang paghimo og Memorandum of Understanding alang sa 93-1 ug resolusyon alang sa Cebu Bus Rapid Transit (CBRT) project.
Sigon ni Baricuatro, nga adunay panahon sa pagpakamaayung tawo ug aduna usab panahon nga mapuno ang usa ka tawo, dugang niini nga medyo nalangay ang mga legislative agenda niini nga posibleng makaapektar sa relasyon sa duha ka liderato.
Taliwala usab sa tensiyon sa duha ka liderato, mibutyag ang gobernadora nga andam ra usab siya makig-isturya sa bise-gobernador kung ugaling buot niini nga mangayo og dispensa.
Una nang mibutyag si Vice Governor Anthony Glenn Soco, nga dili niya patulan ang kasuko ni Baricuatro ngadto ka niya, gumikan kay natural lamang nga mo kuwestiyon sa lehislatura sa lakang sa gobernadora may labot sa Compromise Agreement.
