CEBU CITY-Dili tugotan ni Governor Gwen Garcia ang mga mananaog nga contingents sa Sinulog sa Kabataan sa Lalawigan nga makaapil sa Sinulog Grand Showdown.
Nipahibalo si Gobernador Gwendolyn Garcia atol sa iyang ikaduhang coordination meeting uban sa nagkalain-laing opisyal sa lokal nga kagamhanan alang sa umaabot nga Provincial Youth Festival.
Dihang gipangutana ni Cebu City Councilor Joy Pesquera kon tugutan ba niya ang mga mananaog nga contingents nga makasalmot sa Sinulog Grand Showdown sa South Road Properties (SRP) karong umaabot nga Enero 21, 2024,apan negatibo ang tubag ni Garcia.
Gihatagan og gibug-aton ni Garcia nga dili siya gusto nga mabutang sa peligro ang kaluwasan sa mga mananayaw ilabi na sa kainit sa panahon.
Labing menos 18 ka local government units ang nipadayag og interes nga mosalmot sa maong kalihukan.
Apil na niini ang mga guest performers gikan sa Tribu Basakanon ug Sugat Kabanhawan gikan sa lungsod sa Minglanilla, diin si Garcia maoy mosayaw alang sa iyang tinuig nga halad sa Sto. Niño.
Makadawat og P3 milyones ang unang dapit, P2 milyones ang ikaduhang dapit, P1.5 milyones ang ikatulong dapit, P1 milyon ang ikaupat, ug mas adunahan og P750,000 ang ikalimang dapit.
Samtang ang mga non-winning contingents dili mopauli nga walay dala kay matag usa kanila makadawat og consolation prize nga P500,000.
