CENTRAL VISAYAS- Gikatakdang maglunsad og programa ang Commission on Higher Education Regional Office 7 (CHED-7) nga nagtumong sa pagtabang sa mga estudyante sa senior high school nga maka-transition sa kolehiyo pinaagi sa pagsulbad sa mga kakulangan sa pagbasa, numeracy, ug well-being.
Ang Bridging Health, Reading, and Numeracy Development (BHRAND) Project, nga gisugdan sa CHED-7, ipatuman uban sa pakigtambayayong sa mga pampubliko ug pribadong higher education institutions (HEIs) sa Central Visayas, lakip ang mga state universities and colleges (SUCs) ug mga lokal nga community college.
Gibutyag ni CHED-7 Information Officer Jogi S. Rivamonte nga kabahin kini sa ika-32 nga anibersaryo sa pagkatukod sa ahensya.
Ang BHRAND Project usa sa pipila ka mga inisyatibo nga gipasiugda sa CHED-7 aron mapauswag ang pag-access ug kalidad sa mas taas nga edukasyon sa rehiyon.
Gihisgutan usab ni Rivamonte ang mga programa sa tabang pinansyal sa estudyante sa CHED, ang Unified Student Financial Assistance System for Tertiary Education (UniFAST), ug ang Expanded Tertiary Education Equivalency and Accreditation Program (ETEEAP) isip usa sa mga programa nga padayon nga gipatuman sa ahensya alang sa mga estudyante sa Central Visayas.
Magpahigayon usba ang CHED-7 og online forum karong adlawa, Hunyo 2, bahin sa kahimsog ug kaayohan sa estudyante, nga giulohan og “Thriving Together, Preserving Health and Well-Being for Equitable Scholarship for a Future-Ready Bagong Pilipinas,” nga naglambigit sa mga HEI sa tibuok rehiyon.
Ang selebrasyon sa anibersaryo, nga may temang “Achieving Knowledge Economy Together for a Future-Ready Bagong Pilipinas,” magsugod sa Mayo 18 hangtod Hunyo 11.
