Gipangunahan ni Cebu Governor Pamela Baricuatro, kauban ang mga opisyal sa dakbayan sa Danao, ang pagpahigayon sa groundbreaking ceremonies alang sa duha ka dagkong proyekto sa imprastraktura niadtong adlawng Martes, Abril 28.
Gisugdan ang seremonya alang sa pagtukod sa Guinacot–Taboc Bridge ug ang pagpalambo sa City Waterworks System, diin ang maong mga proyekto gipunduhan sa kagamhanan sa Probinsya sa Sugbo. Kini gitumong aron mapalig-on ang koneksyon sa mga barangay ug masiguro ang lig-on nga serbisyo sa tubig alang sa mga molupyo ubos sa panan-awon nga “brighter Danao for the Danawanon Family.”
Naglangkob ang Guinacot–Taboc Bridge og gitas-on nga 42 metros ug gilapdon nga 8 metros aron pulihan ang karaan nga footbridge nga naguba kaniadto sa bagyong Tino. Gilauman nga kon mahuman na ang maong konkretong taytayan, mas mapadali ug mas luwas na ang pagbiyahe sa mga residente tali sa Barangay Guinacot ug Barangay Taboc paingon sa mga tunghaan ug merkado.
Samtang sa laing bahin, palapdan usab ang kapasidad sa Waterworks System sa dakbayan pinaagi sa pagtukod og clarifier facility, dugang flocculation tank, ug duha ka modular water tanks nga adunay kapasidad nga 5,000 cubic meters matag usa. Apil usab sa trabahuon ang paglubong og mga tubo aron maabot sa dugang mga barangay ug industrial zones ang suplay sa tubig.
Matod ni Mayor Nito Durano, ang maong mga proyekto simbolo sa hugot nga panaghiusa sa kagamhanan sa dakbayan ug sa Kapitolyo aron madala ang batakang serbisyo ngadto sa katawhan. Gipasigarbo usab sa mayor nga ang Danao nagpabiling usa sa adunay labing barato nga bayranan sa tubig sa tibuok probinsya nga mokantidad lamang og 50 pesos matag 10 cubic meters alang sa kapin 17,000 ka mga panimalay.
