LANAO DEL SUR- Patay ang duha ka mga tawo ug naangol ang tulo sa ambush sa Barangay Paigoay, Marogong, Lanao del Sur, Sabado, Disyembre 7, 2024.
Gikompirmar ni Brig.Gen. Romeo Juan Macapaz, director sa Police Regional Office-Bangsamoro Autonomous Region ang mga namatay niadtong Domingo.
Giila ang mga namatay nga sila si retired police officer Solaiman Alibasa ug iyang kauban nga si Hadji Asrap Sandab.
Ang kapulisan sa Marogong nitaho nga sila si Alibasa, Sandab, ug laing tulo ka tawo paingon sa Malabang sakay sa pula nga Toyota Innova dihang nahitabo ang pag-atake.
Gipusil sa mga armado nga nagbutang daplin sa highway sa hilit nga baryo sa Barangay Paigoay ang ilang sakyanan.
Giila ang mga naangol nga sila si Sanaoray Alibasa, Sarpia Mangayao, ug retiradong pulis nga si Ramil Bao.
Ang mga otoridad nakig-alayon sa mga lokal nga opisyal sa Lanao del Sur aron mailhan ang mga suspek ug pasakaan og tukmang kaso.
