Niapelar ang grupo sa Bagong Alyansang Makabayan (BAYAN) sa Bicameral Conference Committee nga ipagawas ang kompletong listahan sa kontrobersyal nga ‘allocables’.
Gitawag sa grupo ang allocables isip usa ka modernong porma sa pork barrel o ilegal nga gi-allocate nga pondo sama sa pork barrel fund nga kaniadto gideklarar nga ilegal sa Korte Suprema.
Base sa pahayag nga gipagawas sa grupo, miapelar kini sa Bicam nga ipahibalo sa publiko ang tanang pondo nga gisulod ug gipulihan gikan sa orihinal nga sulod sa gisugyot nga pondo alang sa 2026.
Ang listahan sa gi-allocate nga pondo alang sa matag kongresista sa distrito, representante sa party-list, ug matag Senador kinahanglan usab nga i-itemize.
Giawhag usab sa grupo ang duha ka balay balauranan nga ibutyag ang tanang timeline ug mekanismo nga gigamit sa pagtimbang-timbang ug pag-allocate sa badyet aron mas masabtan kini sa publiko.
Niining paagiha, mahatagan ang publiko og higayon nga ma-access ang sulod sa gisugyot nga pondo, mahibal-an kung giunsa kini gi-allocate, ug adunay higayon nga makahatag sa ilang kaugalingong feedback sa pondo.
Ang grupo nagpasidaan nga ang pagdali sa pagpasar sa nasudnong pundo sa 2026 magpalig-on lamang sa mga pagduda sa publiko nga ang nasudnong pundo giumol lamang alang sa kaayohan sa pipila.
Ang grupo miapelar nga ang mga hard ug digital nga kopya sa badyet sa 2026 kinahanglan nga ipagawas, base usab sa saad sa duha ka balay balauranan sa Kongreso nga himuong bukas ang mga deliberasyon sa badyet.
