Napalgang patay ang usa ka habalhabal driver human maanod sa kusog nga baha sa Barangay Guinacot, Danao City, Cebu tungod sa bagyong Ursula.
Unang nabalitaang na-missing ang biktimang si Jonathan Canggas, 31 anyos, ug residente sa Barangay Togonon, sa susamang syudad.
Matud sa head sa Danao City Disaster Risk Reduction and Management Office nga si Roland Reyes nga mopauli unta sa panimalay si Canggas human nag-inom sa balay sa iyang ig-agaw niadtong bisperas sa Pasko.
Apan midayon gayud og pauli ang biktima ug gibilin ang motorsiklo niini.
Dugang pa ni Reyes nga nabalaka pag-ayo ang asawa sa biktima human nga wala kini makabalik hinungdan nga ila kining gi-report sa otoridad pagkaugma.
Mipahigayon og search and retrival operations ang Danao City DRRMO kaganihang buntag ug pagkalabay sa pipila ka oras, nakit-an ang patayng lawas ni Canggas sa Awihao Dam sa Barangay Guinacot.
Sa pagkakaron, gihaya na sa punerarya ang patayng lawas sa biktima human mi-assist sa pagpahiluna ang LGU sa Danao City.
