Mitumaw ang halapad nga lihok-protesta sa African country nga Madagascar diin gatusan ka mga batan-on sa ilang nasud ang misung sa ga kadalanan aron ipabati ang kasagmuyo sa bulay-og nga serbisyo sa tubig ug kuryente.
Gani sa maong mga demonstrasyon kay mipabuto na og tear gas ang mga kapulisan sa Antananarivo, ang kapitolyo sa maong nasud niadtong Biyernes, Oktubre 3.
Nasaksihan pa ang mga nagprotesta nga nagwara-wara sa de-kalaberang simbolo nga kinutlo gikan sa usa ka Japanese Anime og nahimong simbolo sab sa mga lihok-protesta sa ubang kanasuran.
Ang mga health worker mitabang na sa nasamdan nga mga nagprotesta samtang ang mga pulis nagduso sa mga tawo pabalik ug gikarga ang mga demonstrador sa mga truck diin ang mga nagprotesta nagsunog, gamit ang mga ligid ug mga bato isip barikada.
Gisaysay sa mga demonstrador nga kini ang resulta sa pag-inutil sa mga batakang panginahanglan sa katilingban diin ang mga Gen Z ang nanguna sa protesta.
Ang United Nations kay nag-ingon nga 22 ka mga tawo ang namatay ug labaw pa sa 100 ang nasamdan sukad sa mga protesta miulbo sa miaging semana.
