CEBU CITY — Giluwas sa mga sakop sa Philippine Coast Guard (PCG)-7 ang tanang mga sakay sa usa ka fast craft human kini mitikyaob og dyutay sa kadagatan sa Sibonga, Cebu tungod sa kusog nga bawod.
Anaa na sa luwas nga kahimtang ang 59 ka mga pasahero sa MV Siargao Princess diin mibyahe kini gikan sa Loon, Bohol sa takna nga alas-9:30 sa buntag.
Matud sa tigpamaba sa PCG-7 nga si Lieutenant Junior Grade Michael John Encina nga daling mi-report kanila ang coast guard on duty sa maong barko human kini na-half submerge.
Hinungdan nga dali kining girespondehan sa mga sakop sa PCG-7, MARINA, PNP Maritime, ug ang local government unit mismo sa Carcar ug mga kasikbit nga mga lungsod.
Gidala na sa tambalanan ang pipila ka mga apektadong pasahero samtang gidala ang uban pa sa Pier 3 sa dakbayan sa Sugbo.
Walay natalang samdan o namatay human sa maong insidente sa kadagatan.
