CEBU CITY – Andam nga makig-rock and roll ang mga banda nga musalmot sa ‘Battle of the Bands’ sa Handog Pasasalamat ng Bombo Radyo at Star FM sa Sinulog 2020.
Pagasugdan ang nahisgutang event karung alas 8 sa gabii ug ipahigayon kini sa atubangan mismo sa Legislative Building sa Cebu City Hall o Plaza Sugbo.
Gi-atangan sa mga Sugbuanon ang perfomance sa mga banda nga Bulhot, Dritch, Landscape PH, Tribu Taguro, Square Root of 5, Kids to Kids, Krack Headz, Kingzscepter, at Fish Tempo.
Sa pakighinabi sa Bombo Radyo Cebu kang Arwen Dave Yamed, ang lead guitarist sa banda nga Krack Headz, matud pa nga andam na silang mutukar unyang gabii.
Matud pa ni Yamed nga bisan ug sila ang pinakabata sa mga partisipante, giingong ipakita nila nga aduna silay ikabuga ug andam nga musabay sa mga beterano na nga mga banda.
Gawas sa mga misalmot nga banda, gikahinaman usab ang live performance sa 2nd Runner Up ug Best Interpreter sa Bombo Music Festival 2020, Jose LG Fuentes kung diin kantahon niini ang iyahang winning piece nga ‘LDR’ ug ang nadag-an niini nga ‘Panumpa’ niadtong 2018 Bombo Music Festival.
Mangsabwag usab ang Bombo Radyo ug Star FM Cebu ug libre nga tshirts alang sa mga audience.
