Niinsistir ang Malacañang nga ang gihimo sa China sa mga barko sa Pilipinas atol sa rotation ug resupply mission sa Ayungin Shoal niadtong Hunyo 17 dili makonsiderar nga “armed attack” bisan paman nga naputol ang tudlo sa usa ka Navy personnel.
Kini ang gihimong pamahayag ni Executive Secretary Lucas Bersamin sa usa ka press conference human nag convine ang National Maritime Council ug nakahukom nga irekomendar ngadto kang Presidente Bongbong Marcos nga ang sunod nga rotation ug resupply missions sa BRP Sierra Madre sa Ayungin Shoal kinahanglang ipahibalo sa publiko nga walay rason ang Beijing nga babagan ang mga bangka sa Pilipinas.
Matod ni Bersamin, posibleng “inadvertence” lang o aksidente ang nahitabo niadtong Lunes.
Gipahayag ni Bersamin nga sa mga video sa militar, nakuha nila ang usa ka bolo ug wasay nga gigamit sa China Coast Guard ug wala nay lain pa.
Gikonsiderar usab nga posibleng hinungdan nga nahimong agresibo ang China Coast Guard niadtong Hunyo 17 kay wa sila masayod nga mo-resupply ang Pilipinas.
Matod ni Bersamin, nagpabiling abli ang Pilipinas nga makig-estorya sa China aron mahupay ang tensiyon sa West Philippine Sea.
Dugang pa, nga dili kini makonsiderar nga ipasaka ang isyu ngadto sa mas taas nga international body tungod kay mahimo ug sayon ra kining masulbad kung magtinabangay ang China ug Pilipinas.
Kahinumduman nga sa insidente niadtong Lunes, nigamit og kutsilyo ug wasay ang mga personahe sa Chinese Coast Guard ug gikulata pa ang mga sundalong Pilipino og mga lipak samtang balik-balik nga giatake ang mga bangka sa Pilipinas.
Gihisgutan usab ang rason sa pagkupos sa inflatable boat sa Pilipinas samtang naguba usab ang pipila ka mga ekipo lakip na ang navigational screen.
Sa ulahi, misakay nalang sila sa mga rubber boat sa Philippine Navy ug gikawat ang duha ka bangka sa Pilipinas ug M4 rifles nga dalhon unta sa mga tropa sa BRP Sierra Madre sa Ayungin Shoal.
