Nagpakita na usab sa iyahang kahanas ang veteran nga hardinero nga si Graham Barratt gikan sa Gloucestershire, United Kingdom, sa pagpananom human makadawat og duha ka bag-ong world record niadtong Hunyo 25.
Diin giila ang iyang ani nga ahos sa elepante, nga mitimbang og 1.75 ka kilo ug 7.5 ka pulgada ang gilapdon. Kini nga ahos anaa sa 35 ka pilo nga mas bug-at kon itandi kasagarang ahos nga makita sa mga grocery store.
Gitanom niya kini sulod sa napulo ka tuig pinaagi sa pagpili sa pinakadako nga liso gikan sa matag ani. Sa pagtanom niadtong Setyembre 2025, migamit siya og black weed membrane aron mapanalipdan ang ahos gikan sa katugnaw. Giangkon usab niini nga dili sayon ang proseso kay ang mga nunal, usa, ug koneho misulay sa pagguba niini, apan swerte nga naluwas ang higanteng ahos.
Gawas sa iyang ahos, nailhan usab ang iyang ani nga pea pods. Kini mitimbang og 28 gramos, lima ka pilo nga mas bug-at kay sa tipikal nga snow pea. Tungod niini, ang Guinness World Records nagbukas og bag-ong kategorya para sa pinakabug-at nga pea pod. Naglaum si Barratt nga pinaagi sa iyang mga rekord, iyang madasig ang ubang mga hardinero sa tibuok kalibutan nga sulayan kini nga klase sa pagpananom ug magtakda sa ilang kaugalingong mga rekord sa umaabot.
