Gi-postpone sa Pre-Trial Chamber I sa International Criminal Court (ICC) ang gikatakda nga pagdungog alang sa pagkumpirma sa mga kaso batok kang kanhi Presidente Rodrigo Duterte, nga orihinal nga gikatakda sa Septiyembre 23, 2025.
Ang desisyon gumikan sa hangyo sa kampo ni Duterte nga i-postpone ang pagdungog tungod sa ilang pamahayag nga dili siya “fit to stand trial” o dili na makatambong sa husay tungod sa kahimtang sa iyang panglawas.
Sumala sa ICC, ang limitado nga pag-postpone gipatuman aron mahatagan ang kasulbaran sa nasangpit nga hangyo ug uban pang may kalabutan nga mga butang.
Samtang si Judge María del Socorro Flores Liera nagpagawas ug dissenting opinion, nga gisupak ang pag-postpone sa pagdungog.
Kahinumduman nga si Duterte gidakop niadtong Marso 11, 2025, may kalambigitan sa mga krimen batok sa katawhan, lakip na ang pagpatay, torture, ug pagpanglugos, nga giingong nahimo ubos sa iyang pamunoan sa Davao City ug sa iyang administrasyon isip Presidente sa Pilipinas.
Ang katuyoan sa pagkumpirma sa pagdungog sa mga kaso mao ang pagtino kung adunay igo nga ebidensya aron mapadayon ang kaso hangtod sa yugto sa pagsulay, ug kung ugaling mapamatud-an na ang mga kaso, ibalhin kini sa Trial Chamber alang sa pormal nga pagsulay.
