PROVINCE OF BOHOL- Giklaro ni Police Regional Office (PRO) 7 director Brig.Gen. Anthony Aberin niadtong Miyerkules nga ang hepe sa kapulisan sa Panglao girelibohan sa iyang katungdanan tungod sa one-strike policy sa Philippine National Police (PNP) batok sa kapakyas pagsulbad sa pagpatay sa mga high-profile nga indibidwal sulod sa 72 ka oras.
Kini nga pamahayag ni Aberin, nunot sa pamahayag sa Bohol Provincial Police Office (BPPO) nga ang pag-reassign ni kanhi Hepe sa Pangalo Police Station nga si Police Major Andie Corpuz tungod sa usa ka promotion requirement.
Gibutyag ni Aberin, atol sa iyang command visit sa BPPO’s headquarters sa Camp Francisco Dagohoy sa Tagbilaran City, nga si Corpuz girelibohan sa iyang katungdanan tungod sa pagpatay sa Danish national nga si Kristian Laurssen sa iyang area of responsibility niadtong Hunyo 27, 2023.
Tungod kay walay suspek nga nasikop sulod sa 72 ka oras nga deadline.
Niadtong Marso, milingkod si Aberin isip hepe sa PRO-7 puli kang Brig.Gen. Jerry Bearis kinsa mismo ang gitangtang sa iyang katungdanan tungod sa samang one-strike policy.
Ang pagrelief ni Bearis sa sinugdan gituohan nga tungod sa high-profile nga pagpatay ni Negros Oriental Gobernador Roel Degamo apan giklaro ni Aberin nga kini tungod sa wala pa masulbad nga pagpatay sa usa ka barangay Kapitan sa Asturias, Cebu.
Giila usab ni Aberin ang mga nahimo ni Corpuz ilabina batok sa illegal drug trade apan giklaro niya nga walay exempted sa pagpatuman sa one-strike policy.
Kahinumduman si Corpuz human siya nangulo sa anti-drug operation nga miresulta sa pagkasakmit sa shabu nga nagkantidad og P13 milyones, nga maoy pinakadakong single-operation drug haul sa probinsiya karong tuiga.
Sa iyang bahin, si Gobernador Aris Aumentado niingon nga nidangop siya kang Aberin nga ibalik si Corpuz isip hepe sa kapolisan sa Panglao aron mangulo sa follow-up operations gumikan sa high-profile drug bust apan gibalibaran kini tungod sa maong polisiya.
