Gi-relieve na sa ilang katungdanan ang hepe sa Sevilla Municipal Police Station (MPS) ug tulo pa ka mga kauban niini human sa reklamo nga giingong ilang gipangulata ang usa ka barangay kagawad atol sa
gipahigayon nga buy-bust operation niadtong Pebrero 10, 2026, didto sa Purok 5, Lower La Suerte, Brgy. Guinob-an, Sevilla, Bohol.
Ang mga nalambigit nga pulis giila nga sila si:
-Police Capt. Amory Napoles (Hepe sa Sevilla MPS)
-Police Master Sergeant Leo Leopoldo
-PMSG Reynaldo Fernandez
-Patrolman Reymon Misa
Matud ni PMajor Rey Olar, spokesperson sa Bohol Police Provincial Office (BPPO), ang maong mga pulis gibutang na sa Regional Personnel Holding and Accounting Section (PHAS) sa Police Regional Office VII sa Cebu samtang nagpadayon ang imbestigasyon sa Provincial Internal Affairs Service (PIAS).
Ubos sa “floating status” ang upat ka pulis aron maseguro nga dili ma-impluwensyahan ang dagan sa kaso.
Ang reklamante nga si Barangay Kagawad Eric Gumanoy pormal nga mipasaka og pasangil batok sa upat ka opisyal, kinsa napasakaan na usab og administrative case sa PIAS.
Gipaniguro ni PMajor Olar nga ang pag-relieve sa mga pulis usa ka lakang aron masiguro ang patas ug walay bias nga imbestigasyon. Dugang pa niya, hugot nga gi-monitor sa BPPO ang progreso sa kaso ug walay “special treatment” nga ihatag ngadto sa bisan kinsa nga sakop sa kapulisan nga nalambigit sa maong pasangil.
