PROVINCE OF BOHOL- Adunay bag-ong liderato ang Tagbilaran City Police Station human pormal nga gi-install si Police Lieutenant Colonel Joey Mallare Bicoy isip Officer-in-Charge (OIC), puli ni Police Lt. Col. John Kareen Escober nga na-relieve human sa kontrobersyal nga kidnapping incident sa Integrated Bus Terminal (IBT) sa Barangay Dao niadtong Marso 11.
Kini ang gitino ni Police Major Rey Olar, tigpamaba sa Bohol Police Provincial Office (BPPO), nga gipahigayon karong adlawa ang turnover ceremony ubos sa pagpangulo ni Provincial Director PCOL Patricio C. Degay Jr.
Gidugang niya nga si PLTCOL Bicoy usa ka beteranong opisyal sa kapulisan nga nagsilbi isip Force Commander sa Bohol Police Provincial Mobile Force Company niadtong 2024 hangtod sayong bahin sa 2025, ug sa ulahi nahimong Deputy Provincial Director for Operations.
Gilauman sa BPPO nga ang kasinatian ni Bicoy ug ang iyang pagkaila sa lokal nga komunidad makatabang sa mas epektibong pagpangulo ug pagpalig-on sa operasyon sa kapulisan sa siyudad.
Nagpahayag usab ang kapulisan nga gilauman nila ang suporta sa publiko aron mapadayon ang kalinaw, kahapsay, ug seguridad sa dakbayan sa Tagbilaran.
Gipunting sa mga opisyales ang panginahanglan sa mas kusgan nga disiplina, liderato, ug panaghiusa sulod sa organisasyon aron masiguro ang epektibong serbisyo ug pagmintinar sa kalinaw ug kahusay sa komunidad. |With reports of Bombo Rexmond Omega
