PROVINCE OF BOHOL- Nakadawat og bag-ong balay ang usa ka pamilya sa mag-uuma sa Barangay Corazon, San Miguel, Bohol pinaagi sa 122nd Libreng Alagad Ug Balay (LAB) Project, usa ka housing initiative sa Bohol Police Provincial Office (BPPO) sa pakigtambayayong sa Balay sa Paglaum.
Pormal nga gitunol ang balay niadtong Hunyo 26 ngadto sa pamilya ni Allen P. Auguis, 47, usa ka mag-uuma, ug sa iyang asawa nga si Marilyn, 50, nga nagpadako sa ilang lima ka mga anak.
Sumala sa BPPO, sulod sa pipila ka tuig naglisod ang pamilya sa pagpaayo sa ilang naguba nga balay tungod sa kakulang sa kita, hinungdan nga naladlad sila sa peligro ilabina panahon sa kusog nga ulan.
Kini nga proyekto gipangulohan sa BPPO ubos ni Police Colonel Patricio Degay Jr., Provincial Director, ug gisuportahan sa programang Balay sa Paglaum, usa ka inisyatiba nga gipaluyohan ni Bohol Governor Erico Aristotle Aumentado ug 3rd District Representative Vanessa Aumentado.
Ang LAB Project usa sa mga community outreach program sa BPPO sa paghatag og disenteng pabalay sa mga pamilyang nanginahanglan ug pagpalig-on sa panagtambayayong tali sa kapulisan, lokal nga kagamhanan, ug sa komunidad.
