Gihingusgan sa Bohol Police Provincial Office ang ilang patas ug walay gidapigan nga imbestigasyon kalabot sa insidente diin nalambigit ang ilang sakop nga nakapusil og sibilyan sa lungsod sa Buenavista nga nakaangol og usa ka hamtong ug usa ka 12-anyos nga bata.
Atol sa pakighinabi sa Bombo Newsteam kang PLTCOL Joseph Berondo, ang tigpamaba sa PNP Bohol nga bisan paman nga nakapiyansa na ang pulis human sa pag-inquest niini nunot sa boluntaryong pagtahan sa iyang kaugalingon sa Buenavista Municipal Police Station pipila ka oras human sa insidente, napasakaan gihapon kini og tukmang kaso hilabi na nga desidedo nga mopasaka ang hamtong nga biktima.
Dugang ni Berondo, nagpaabot nalang sila sa rekomendasyon sa internal affairs ug aksyon nga himoon sa Probinsyal Director.
Subay niini, hugot usab nga gikondenar ni Bohol Provincial Police Director Col. Patricio Degay Jr. ang maong insidente, dungan sa pagpasiugda nga ang tibuok organisasyon sa kapulisan, dili gayud motugot sa bisan unsang ilegal nga binuhatan sa ilang mga sakop.
Gipasalig sa direktor ngadto sa publiko nga daganon ang kaso sa patas nga pamaagi ug walay pabor-pabor aron makab-ot ang tinuod nga hustisya.
Ingon man nga giangkon sa BPPO nga bisan pa man og nakahatag og dautang mantsa sa imahe sa kapolisan ang maong panghitabo, wala kini nagrepresentar sa kinatibuk-ang hanay sa mga pulis sa Bohol nga padayong nag-alagad uban ang dungog, integridad, ug propesyonalismo. via Bombo Rexmond Omega
