Gikasagmuyo ni Cebu City Mayor Edgardo Labella ang dugay nga pag-aginod sa solemn foot procession niadtong bisperas sa Sinulog sa dakbayan sa Sugbo.
Nisalmot sa maong prusisyon ang mayor sa dakbayan ug personal niyang nakita nga nag-antus ang katawhan nga nagbarug ubos sa naglagiting nga kainit.
Matud ni Labella nga anaa sa alas-11 sa buntag ang required nga assembly time sa mga deboto aron makasugod na, apan nagsugod na og aginod ang prusisyon sa takna nga 1:45 sa hapon.
Nabantayan usab sa mayor nga adunay mga nakuyapan ug daling gidala sa ambulansya.
Dugang pa sa mayor nga dili gayud angayang mag-antus ang katawhan nga magbarug sa taas nga panahon bisan pa man og napahiluna na ang mga security forces, lakip na ang mga volunteers gikan sa mga kolehiyo sa Sugbo.
Sayron pa una ni Labella kung nganong nadugay ang pagsugod sa prusisyon.
Tungod niini, makigsabot kini sa mga kapari-an sa Basilica Minore Del Sto. Niño aron hisgutan ang maong problema.
