CEBU CITY–‘Hipokrito’ kung tawagon ni Atty. Clarence Paul Oaminal ang gobyerno sa pag-alma sa Spanish-produced animated film nga ‘Elcano and Magellan‘.
Gibutyag ni Atty. Oaminal nga natural lang nga ‘focus’ ni Ferdinand Magellan ang maong animated film gumikan kay espanyol man ang nagmugna niini hayan bida gayud sa maong salida ang ilahang kaugalingon.
Matud sa manlalaban ingun man historian, nga wala may angayan nga kabalak-an ang gobyerno kung ti-unay nga lig-on ang pagsabot sa mga Pilipino sa kasaysayan sa Pilipinas hayan dili kini maliso bisan pa man sa ipakita nga laing bersyon.
Alang kang Atty Oaminal nga usa kini ka ‘wake up call’ alang sa gobyerno nga hatagan ug pagtagad ang kasaysayan kansang hinayhinay nga gikalimtan.
Gihimug-atan ni Oaminal nga importante sa mga Sugbuanon usab nga lig-on ang pagsabot sa kasaysayan gumikan kay ang Sugbo ang pinuy-anan sa bantogan nga mga bayani.
Sugyot niini nga ibutang usab ang Cebuano history kung diin nakatutok usab sa kasaysaysan sa Sugbo diin mismong Sugbuanon ang magsuwat niini.
