MANDAUE CITY,CEBU- Gitutukan na karon sa lokal nga panggamhanan sa Mandaue City ang pagtukod sa usa ka holding center alang sa mga menor de edad nga maluwas sa dalan, ilabina sa mga libod-suroy o street children.
Gibisita mismo ni City Administrator Atty. Sally Malig-on ang maong pasilidad niadtong Lunes, Agosto 4, aron personal nga masuta ang kahimtang ug kalambuan sa proyekto human kini makita ni Mayor Jonkie Ouano sa unang semana sa iyahang paglingkod isip mayor sa lungsod.
Nakit-an sa alkalde nga ang daang pasilidad nga gitagana unta para sa mga rescue nga kabataan sa City Social Welfare Services (CSWS), gihimo na lang stockroom ug halos dili na magamit.
Subay niining obserbasyon, mipasalig si Atty. Malig-on nga ipalambu dayon ang pasilidad aron malikayan ang pag-ikyas sa mga menor de edad nga temporaryong ipailawom sa pag-atiman sa CSWS samtang giandam ang ilang reintegrasyon sa pamilya o sa komunidad.
Gilauman nga ang maong holding center makaserbisyo isip temporaryong puluy-anan alang sa mga kabataang walay panimalay o na-rescue sa mga operasyon batok sa pagpanlimos, paggamit sa solvent, ug uban pang kalihokan sa kadalanan.
Samtang, gipahimangnoan sa City Administrator ang mga kauban sa CSWS nga hugtan pa ang ilang mga lakang ug paningkamot aron mas maprotektahan ang kaayohan sa mga kabataan nga ilang giatiman.
Padayon ang koordinasyon sa CSWS, kapulisan ug uban pang ahensya sa gobyerno aron masiguro ang kaluwasan ug kabag-ohan sa kinabuhi sa mga menor de edad nga ilang matabangan.
