Gikumpirma sa House Prosecution Panel ang ilang pagpangandam alang sa pagpadayon sa impeachment proceedings batok kang Bise Presidente Sara Duterte nga gikatakdang sugdan pag-usab karong Nobyembre 9.
Matod sa panel, nangandam na sila sa pag-cross-examine sa mga saksi nga ipresentar sa kampo sa Bise Presidente.
Sumala ni Lead Prosecutor ug Representative Gerville Luistro, bisan wala pa makadawat sa opisyal nga listahan sa mga saksi, nagsugod na ang panel sa pagtuon sa posibleng mga punto ug argumento sa depensa.
Gikatakdang ipahigayon ang mga pagdungog sa Nobyembre 9 hangtod 13, Nobyembre 19 hangtod 20, ug Nobyembre 23.
Sa pagkakaron, nagpunting ang nahibiling mga artikulo sa impeachment sa giingong mga bahandi ni Duterte nga wala pa mahatagi og katin-awan. Lakip sa mga dokumentong gisusi sa prosekusyon ang mga rekord sa bangko, tax returns, Statements of Assets, Liabilities, and Net Worth (SALN), mga polisiya sa insurance ug mga investment.
