METRO MANILA-Misaad si House Speaker Martin Romualdez nga ang Kamara magpadayon sa pagsuporta sa kalamboan sa BARMM isip kabahin sa mga inisyatibo sa kalinaw sa nasud.
Ang pamahayag sa House leader nunot sa pagsumiter sa ikatulong National Government ug Bangsamoro Government Intergovernmental Relations Body (IGRB) Progress Report ngadto kang Presidente Ferdinand R. Marcos, Jr.
Matod niya nga makonsiderar kini nga milestone sa kolaborasyon aron makab-ot ang long-term nga kalinaw ug kauswagan sa Mindanao.
Dugang ni Romualdez, ang mga nakab-ot nga anaa sa IGRB progress report nagpakita sa mahinungdanong papel sa panaghiusa subay sa diwa sa Bag-ong Pilipinas diin walay mabiyaan.
Sa samang higayon, si Speaker Romualdez nagkahiusa sa pagtinguha sa malinawon nga 2025 BARMM elections nga mao’y unang regular nga eleksyon alang sa BARMM parliament.
