Giangkon sa mga rebeldeng Houthi sa Yemen ang responsibilidad sa pag-atake sa duha ka Saudi oil tanker sa Red Sea.
Diin giila sa mga Houthi ang mga barko nga Encelia ug Layla.
Bisan tuod ang grupo sa mga rebelde miangkon sa responsibilidad sa pag-atake, wala pa kini gikumpirmar.
Sumala sa ilang tigpamaba sa militar, nga si Yahya Saree, ang mga barko gitarget og mga missile ug drone tungod sa paglapas sa ilang naval blockade batok sa mga barko sa Saudi Arabia.
Miingon siya nga ang mga Houthi misaad nga ipadayon ang ilang mga operasyon sa naval ingon man ang pagpatuman sa ilang gitawag nga “siege for a siege equation.”
Sa sayo pa, karong buntaga, Huwebes, Hulyo 23, gikumpirma sa Saudi Press Agency nga ang barko sa Encelia naigo samtang naglawig sa Pulang Dagat, hinungdan sa sunog sa proa o atubangan nga bahin sa barko.
Wala pa’y kumpirmasyon sa gidak-on sa kadaot sa ikaduhang barko, bisan tuod ang mga awtoridad mideklarar nga ang tanan nga mga tripulante sa barko luwas ug walay gitaho nga mga kadaot.
Samtang, ang mga pag-atake sa lugar nagpataas sa mga kabalaka bahin sa seguridad sa mga komersyal nga barko nga naglawig sa Red Sea.
Daghang mga oil tanker ang napugos sa pag-ilis og ruta o pagbalik aron malikayan ang Bab el-Mandeb Strait. Ang mga tensyon nakapausbaw usab sa presyo sa lana sa merkado sa kalibutan.
