CEBU – Patay ang tulu ka binuhing baboy human nga gipahimungtan sa kalagut sa usa ka hubug sa Sitio Tore, Barangay Lupa, lungsod sa Compostela.
Giila ang suspek nga si Jover Duterte, 44 anyus ug residente sa nahisgutang dapit.
Gisaysay ni Police Staff Sergeant Darel Rondina, imbestigador sa Compostela PNP, nga hilabihan ka hubug ang suspek ug nangita kini ug bikil sa iyahang igsu-un nga si Kelvin Duterte, 30 anyus.
Matud pa nga naglingkud lang si Kelvin sa gawas nga bahin sa ilahang payag sa dihang kalit nga gidunggab sa suspek gamit ang bu-ak nga botilya apan wala kini ma-igu.
Sa ikaduha nga higayun, puspusan na usab unta kini sa iyahang maguwang gamit ang kahoy apan sa gihapun wala kini ma-igu.
Dali nga nakadagan ang biktima ug nakapangayu ug tabang sa ilahang mga silingan.
Sa kalagut sa suspek, miliput kini sa luyu nga bahin sa payag kung diin anaa ang mga binuhing baboy sa biktima ug mao kini ang iyahang gipamatay.
Nasikup ang suspek ug nabalhug karun sa Compostela PNP detention cell, samtang desido nga mupasaka ug kaso ang manghud niini.
Kasong attempted parricide ug kalapasan sa Animal Welfare Act ang atubangon sa suspetsado.
