CEBU CITY- Padayon ang imbestigasyon sa kapulisan aron mailhan ug mapanubag ang nag-post og hulga sa pagpamusil batok sa Cebu Eastern College pinaagi sa social media, samtang gipasalig sa Cebu City Police Office (CCPO) nga seryoso nilang gitagad ang insidente aron masiguro ang kaluwasan sa mga estudyante ug mga magtutudlo.
Kini ang gipadayag ni PLTCOL Franco Oriol, Deputy City Director for Administration sa CCPO, gipasa na sa ilang Cybercrime Unit ang kaso alang sa digital forensic examination sa social media account nga nag-post sa hulga.
Padayon pa ang imbestigasyon aron matino ang identidad sa tag-iya sa account ug mapasaka ang angay nga kaso batok niini.
Nasayran usab nga ang hulga gipatik sulod sa usa ka exclusive online community sa mga estudyante sa maong eskwelahan, nga nagpasabot nga posible nga estudyante mismo ang responsable.
Bisan pa og posible nga prank lamang ang hulga, giingon ni Oriol nga wala kini gipasagdan ug giisip gihapon nga seryoso tungod kay prayoridad ang kaluwasan sa mga estudyante ug faculty.
Nagpahimangno usab ang kapulisan nga likayan ang mga prank o hulga sa social media kay kini mahimong mosangpot sa kriminal nga kaso ug disciplinary action gikan sa eskwelahan.
Gipasalig sa CCPO ang padayon nga pagbantay sa tanang eskwelahan sa Cebu City aron mapanalipdan ang mga estudyante ug mapadayon ang kaluwasan sa komunidad.
