Nanghinaot ang kabanay sa biktima nga gitagud-tagod ang lawas nga dili mapasagdan sa otoridad ang kaso sa ilang igsuon ug makab-ot ang hustisya sa kamatayon niini.
Sa eksklusibong pakighinabi sa Bombo Radyo Cebu kang Analou Lopez ang igsuon sa biktima nga si Angelie Lopez, gibutyag niini gilubong nila ang ilang igsuon niadtong Abril ning kasamtangang tuig nga wala pa makompleto ang parte sa lawas niini.
Gisaysay pa ni Analou nga katapusang nilang na-kontak ang ilang igsuon niadtong sayong bahin sa buwan sa Oktubre sa nakalabay’ng tuig, pina-agi sa ilang family group chat. Apan pila ka adlaw ang nakalabay, wala na kini nila maka-istorya ug gani wala na kini nag-communicate usab kanila bisan ug pila na ka birthday ang gisaulog sa miyembro sa pamilya.
Nagduda na matod pa sila kung unsa ang nahitabo kang Angelie sanglit Oktubre 18, 2020 ang katapusan nila nga komunikasyon. Oktubre 23 napalgan ang mga kamot niini, samtang Oktubre 24 sa dihang nakadungog ug balita ang kabanay nga adunay nakaplagan nga lawas sa sapa sa Sitio Kalubihan Brgy. Talamban Cebu City.
Buwan sa Disyembre petsa otso sa nakalabay’ng tuig, niadto na matod pa si Analou sa balay ni Angelie sa may Tipolo dakbayan sa Mandaue diin nakahinabi matod pa niini ang bana nga si Harold Carillo Kintanar. Gibutyag matod pa niini nga nilarga si Angelie ug wala kini mahibawo asa niadto sanglit nag-away matod pa sila. Apan mobalik matod pa kini kay magbayad sa ilang gipuy-an.
Segon kang Analou nga lakip sa nakapa-aghat nila nga sayron kung asa si Angelie, mao ang post sa facebook account niini nga daw sa maka-duda sanglit posible nga dili si Angelie ang nagpost niini. Subay niini dali nga gipa-blotter ni Analou sa Subangdaku Police Station ang maong panghitabo hangtod nga niabot ang adlaw nga ilang nasayran nga ang gitagud-tagod nga lawas mao ang ilang igsuon nga si Angelie human nga nagmatch ang DNA test niini.
Na-file na ang kaso batok sa suspek ug anaa na kini sa prosekusyon. Gipaningkamutan sa pamilya nga adunay makab-ot nga hustisya sa maong panghitabo.
