Gibasura sa International Criminal Court (ICC) Pre-Trial Chamber I ang hangyo sa defense team ni kanhi Presidente Rodrigo Duterte nga iapela ang kumpirmasyon sa tanang mga kaso batok kaniya sa kasong crimes against humanity.
Nakahukom ang chamber nga ipadala ang kaso sa usa ka hingpit nga pagdungog.
Diin ang Trial Chamber III magpahigayon og status conference sa kaso ni Duterte sa Mayo 27.
Samtang, nipagawas ang ICC og update sa kahimtang ni kanhi Presidente Rodrigo Duterte samtang anaa kini sa kustodiya sa The Hague.
Sumala sa ICC Registry, si Duterte giisip nga usa ka “elderly detained person” nga adunay taas nga risgo nga matumba, ug busa gipailalom sa continuous cell monitoring.
Gipasabot sa ICC nga sa talagsaong mga higayon nga matumba si Duterte, ang mga kawani sa kustodiya dali nga mitubag aron matabangan siya ug dayon mangayo og medikal nga eksaminasyon.
Ingon man nga sa milabay nga 30 ka adlaw, namatikdan sa ICC nga walay natala nga mga insidente sa pagkatumba sa kanhi presidente.
Gidugang sa ICC nga ang gikinahanglan nga mga pag-adjust gihimo sa iyang selda ug kabtangan aron masiguro ang iyang kaluwasan ug kahupayan.
Bisan pa, ang mga detalye sa iyang mga chronic ailments wala gipaambit tungod sa medical confidentiality.
Si Duterte, kinsa 81 anyos, nag-atubang ug mga kaso sa krimen batok sa katawhan nga may kalabotan sa gubat batok sa droga ug sa giingong Davao Death Squad.
Niadtong Abril 23, 2026, gikumpirma sa ICC ang mga kaso batok kaniya, lakip ang pagpatay ug pagsulay sa pagpatay.
Ang update gikan sa ICC nagtumong sa pagpakita nga padayon nilang gibantayan ang panglawas ug kaluwasan sa kanhi presidente samtang nagpadayon ang pag-uswag sa iyang kaso.
