CEBU CITY-Hilabihan ang pasalamat sa kapamilya sa chief officer nga si Eduward Sareno, ang Chief Officer sa cargo ship nga Gulf Livestock 1 nga nalunod sa kadagatan sa South-West Japan.
Sa exclusive interview sa Bombo Radyo Cebu sa tulumanong Zona Libre sa maguwang ni Eduward nga si Mesael Sareno, giingon niini nga nakugang sila sa balita niadtong Setyembre 2,2020 nga nalunod ang gisakyang barko sa iyang igsoon. Nakapanghupaw matud kini sa nahitabo sanglit wala sila masayod kung buhi ba ang iyang igsoon.
Emosyonal nga gibutyag ni Mesael, kinsang usa usab ka seaman nga samtang nagsakay kini sa usa usab ka tanker vessel, hilabihan ang kabalaka niini. Lakip na ang pamilya ni Eduward, nga anaa sa Brgy. Luka, Oslob, probinsya sa Sugbo hilabihan usab ang kabalaka ug pagkakugang sa insidente.
Sa dihang nasayran ni Mesael nga narescue ang iyang igsoon ug sa dihang nakita niini ang video sa pagrescue wala matud pa niini nakaya nga lantawon ang igsoong nangluspad na gumikan sa ka dugay usab nga nahumol sa dagat.
Nagtoo hinoon si Mesael nga kayang luwason sa iyang igsoon ang kaugalingon sanglit, kanhi usab kining mananagat apan di gihapon malikayang mabalaka.
Nagpasalamat sa Ginoon si Mesael sa ikaduhang kinabuhi nga gihatag niini sa iyang manghud.
