ZIMBABWE-Usa sa sa mga gikahadlokan sa kalibutan sa mga ihas nga hayop mao ang leon.Ug kung ugaling ang usa ka hayop ang madakpan niini, siguradong dili na gyud kini makaluwas pa.
Apan lahi ang nahitabo sa Hwange National Park sa Zimbabwe diin nakuhaan og video ang usa ka ihas nga iro nga gitangang-tangag sa usa ka leon.
Nagtoo ang mga bisita sa maong park nga patay na ang ihas nga iro. Makita sa video nga giguroy-guroy kini sa leon samtang gipaak ang liog.
Samtang duna usab lain nga ihas nga iro nga daw sama nga boot muluwas sa iro nga gitangag sa leon.
Nasayran nga maong iro ang kan-onon sa mga leon ug kanunay kini nilang panid-an aron nga madakpan.Apan pipila ka minuto ang nakalabay gibuhi-an sa leon ang iro nga iyang gitangag sa pagtoo nga patay na kini aron nga dakpon ang lain pang iro.
Sa dihang nabuhi-an kini, kalit mibarog ang iro ug midagan.
Nakurat ang mga naa sa park niadtong higayona tungod kay nag “play dead” o nagpakaaron ingnon ra diay nga patay ang maong iro aron makaluwas.
Luwas nga nakaikyas ang duha ka ihas nga iro gikan sa maong leon.
