Miabot na sa labing menos 12 ka mga kinabuhi ang natalang namatay sa grabe nga pagbaha sa Kentucky ug posible nga mosaka pa kini samtang ang hulga sa snowstorm kay padayon nga gibantayan nga mahimong makapakomplikado sa mga paningkamot sa pagluwas alang sa mga residente.
Mao kini ang gipaambit ni Gobernador Andy Beshear.
Ang kusog nga pagbaha nga nagsugod niadtong Sabado nakaapekto sa halos tibuok estado sa Kentucky, U.S. ingon man sa mga silingang estado niini.
Diin kapin sa 1,000 ka rescue mission ang gihimo sa mga search team aron matabangan ang mga apektadong residente.
Dugang pa sa mga nangamatay, gatusan ka mga tawo ang nawad-an og balay, ug kapin 14,000 ka mga balay ug negosyo ang walay koryente, samtang 17,000 ang walay tubig.
Sa kasamtangan, ang Kentucky National Guard gipadala aron sa pagtabang sa mga tripulante sa aviation gikan sa Indiana ug Tennessee, ingon man sa federal nga urban search ug rescue teams gikan sa Ohio, Indiana, ug Tennessee.
Ang ubang mga bahin sa estado nakasinati og labaw sa 200 mm nga pag-ulan, ug ang lugar gilauman nga makasinati og hangtod sa 150 mm nga snow, mao nga adunay mga kahadlok nga ang umaabot nga snowstorm makakomplikado sa mga rescue ug relief operations sa gobyerno.
Matod ni Gobernador Beshear nga nisaka og tulo ang ihap sa nangamatay niadtong Lunes, oras sa Amerika, nga niabot na sa 11 ang kinatibuk-an. Siyam niini tungod sa baha, samtang duha ang gikan sa aksidente sa kadalanan.
Ang gobernador nipasidaan nga layo pa ang epekto sa snowstorm.
