Nisaka ngadto sa 577 ang kinatibuk-ang ihap sa mga kaso sa mga nalambigit sa disgrasya sa kadalanan dinhi sa nasod human ang Department of Health (DOH) nitala og 33.5% nga pagsaka kon itandi sa miaging tuig.
Ang maong datos gikan sa buwan sa Disyembre 22, 2024 hangtod sa Enero 2, 2025, diin unom ang natala sa ahensya nga kinatibuk-ang ihap sa mga nangamatay ug upat niini gikan sa mga aksidente sa motorsiklo.
Kalabot niini, dili mominos sa 500 ka mga indibidwal ang nalambigit sa mga disgrasya sa kadalanan sama sa walay helmet ug seatbelts, 108 niini ang nalambigit sa pag-inom og ilimnong makahubog, 415 ang nalambigit sa aksidente sa motorsiklo.
Subay niini, ang DOH padayong nagpahinumdom sa katawhan nga magsul-ob kanunay og safety gears sama sa helmet ug seatbelts sa dili pa mo byahi, dili magdrayb nga hubog ug pagsunod sa mga lagda sa trapiko ug mga signage sa dalan alang sa luwas nga pagbiyahe.
