Nisaka ngadto sa 75 ang kompirmadong ihap sa nangamatay sa magnitude 6.9 nga linog nga miigo sa Bogo City, Cebu niadtong Setyembre 30.
Matod ni Office of the Civil Defense (OCD) deputy administrator ASec. Bernardo Alejandro IV, susihon usab sa ahensiya kung aduna bay gikatahong nangamatay sa magnitude 6.0 nga aftershock nga nitay-og ala 1:06 sa kaadlawon karong adlawa, Oktubre 13.
Samtang, basi sa datos nga niabot na usab sa 600 ang ihap sa mga naangol.
Ug sa pagkakaron, sumala sa opisyal sa OCD, niabot na sa halos 11,000 ang ihap sa mga aftershocks nga natala gikan sa magnitude 6.9 nga linog sa Bogo City, ug padayon pa kini sa mga pag-uyog.
Subay niini ang Cebu Provincial Government kay mopalig-on sa hinanaling suporta sa Cebu Provincial Hospital sa Bogo City nunot sa kusog nga 5.8-magnitude nga linog gipaubos gikan sa naunang gikataho nga magnitude 6.0.
Sa inisyal nga taho nga gipadala sa CPH Bogo chief of hospital ngadto kang Capitol Piso Consultant Dr. Elisse Nicole Catalan, temporaryo nilang gipabakwit ang mga pasyente ug gibalik sa Level 1 operations alang sa kaluwasan human natagak ang parapet gikan sa Building 22 isip pag-amping, bisan og walay naangol sa maong insidente.
Gimanduan usab ni Gobernador Pam S. Baricuatro ang mga hingtungdan nga buhatan sa probinsiya, lakip ang Provincial Disaster Risk Reduction and Management Office (PDRRMO) ug Provincial Health Office (PHO), nga makig-alayon dayon sa CPH Bogo aron matubag ang panginahanglanon sa tambalanan ug masiguro ang kaluwasan ug kaharuhay sa mga pasyente ug personnel niini.
